Тус хөтөлбөрийн хүрээнд ЭХЭМҮТ-ийн 17 нарийн мэргэжлийн эмч Аравдугаар сарын 30, 31-ний өдрүүдэд Дундговь аймагт ажиллаж, аймгийн төв болон Дэлгэрхангай, Баянжаргал сумын иргэдэд эрүүл мэндийн тусламж, үйлчилгээ үзүүлсэн байна.

Энэ үеэр эмэгтэйчүүд, хүүхэд, нярайд төрөлжсөн мэргэжлийн үзлэг, оношилгоо, эмчилгээ, зөвлөгөө болон мэс заслын тусламж үзүүлжээ. Тухайлбал, Дундговь аймгийн Нэгдсэн эмнэлэгт эх барих, эмэгтэйчүүдийн чиглэлээр 309, хүүхдийн чиглэлээр 282 үзлэг хийсэн байна. Мөн хөтөлбөрийн хүрээнд нийт 25 мэс заслын тусламж, үйлчилгээ үзүүлснээс найм нь чих, хамар, хоолойн, тав нь эмэгтэйчүүдийн чиглэлийн мэс засал байжээ.

Үзлэг, оношилгооноос гадна орон нутгийн эмч, эмнэлгийн мэргэжилтнүүдийн мэдлэг, ур чадварыг дээшлүүлэх зорилгоор мэргэшүүлэх сургалт зохион байгуулсан байна.

“Энх-Мэнд” үндэсний хөтөлбөр нь орон нутгийн иргэдэд нарийн мэргэжлийн эрүүл мэндийн тусламж, үйлчилгээг ойртуулах, эх, хүүхдийн өвчлөлийг эрт илрүүлэх, шаардлагатай эмчилгээ, мэс заслын тусламжийг цаг алдалгүй хүргэх зорилготой юм.

Эх сурвалж: Дундговь аймаг Засаг даргын Тамгын газар