Өнөөдрийн /2026.10.05/ байдлаар 186.9 мянган га талбайгаас 273.9 мянган тонн үр тариа хураан аваад байна. Харин ургацын урьдчилсан балансаар энэ онд нийт 555.3 мянган тонн үр тариа хураан авах тооцоотой байгаа юм. Энэ онд улсын хэмжээнд нийт 580.4 мянган га-д тариалалт хийсэн бөгөөд үүний 369.7 мянган га нь үр тарианы талбай юм.

Ургацын урьдчилсан балансаар энэ жил 555.3 мянган тонн үр тариа, үүнээс 497.1 мянган тонн улаанбуудай хураан авах тооцоотой. Өөрөөр хэлбэл одоогоор хураасан үр тарианы хэмжээ цаашид нэмэгдэх боломжтой бөгөөд ургац хураалтын үлдсэн хугацаа дотоодын улаанбуудайн нийлүүлэлтэд чухал байна.

Үүнээс гадна 134.3 мянган тонн төмс, 111.6 мянган тонн хүнсний ногоо, 124.1 мянган тонн малын тэжээл, 11.3 мянган тонн тосны ургамлыг тус тус хураан аваад байна.

Хураалтын ажлыг богино хугацаанд дуусгахын тулд одоогоор 951 комбайн, 609 жатка, 230 үтрэм болон үр тариа, төмс, хүнсний ногоо хураах бусад техник ажиллаж байна. Техникийн бэлэн байдлыг тооцоход нийт ургацын ажлыг 26-30 хоногт багтаан дуусгах боломжтой гэж үзжээ.

Харин ургацын талбайд ажиллах хүний нөөцийг оюутан, сонсогч, цэргийн алба хаагчид болон бусад ажиллах хүчээр бүрдүүлсэн байна. Одоогоор нийт 25,324 хүн ургац хураалтад оролцжээ.

Ургац хураалттай зэрэгцэн дотоодын гурилын үйлдвэрлэлд шаардлагатай улаанбуудайн нөөцийг бүрдүүлэх ажил явагдаж байна . Засгийн газраас энэ онд 100 мянган тонн улаанбуудай нөөцлөхөөр төлөвлөснөөс өнөөдрийн /2026.10.05/ байдлаар 52.6 мянган тонныг бүрдүүлжээ.

Ингэснээр ургац хураалтын явц зөвхөн талбайгаас хэдэн тонн бүтээгдэхүүн авч байгаагаар хэмжигдэхгүй, дотоодын гурил, хүнсний хангамжид шаардлагатай түүхий эдийн нөөцийг хэр хэмжээнд бүрдүүлж чадахаас цаашдын хангамжийн тогтвортой байдал шалтгаалах юм.