Тусгай хэрэгцээт хүүхдүүдийн бие бялдрыг чийрэгжүүлэх, нийгэмших чадварыг нэмэгдүүлэх, спортоор дамжуулан урам зориг өгөх зорилготой спорт наадам амжилттай зохион байгуулагдлаа. Тус арга хэмжээг Баянгол дүүргийн Хүүхэд, гэр бүл хөгжил, хамгааллын хэлтэс, дүүргийн Биеийн тамир, спортын хороо болон тусгай хэрэгцээт боловсрол олгодог 70 дугаар сургуулийн хамт олон хамтран зохион байгуулсан юм.

Тусгай хэрэгцээт хүүхдүүдийн хувьд бие махбод болон танин мэдэхүйн онцлогоос шалтгаалан орон зайн баримжаа алдагдах, орчиндоо дасан зохицох чадвар сулрах, анхаарал төвлөрөлт сарних зэрэг хүндрэл түгээмэл ажиглагддаг. Иймээс энэхүү спорт наадам нь зөвхөн тэмцээн уралдаан төдий бус, сэргээн засах болон сэтгэл зүйн өндөр ач холбогдолтой арга хэмжээ болсон юм.

Наадмыг хүүхдүүдийн хөдөлгөөний дутагдлыг нөхөх, зай ба хүчийг зөв тооцоолох чадварыг хөгжүүлэх, мэдрэхүй болон хөдөлгөөний зохицуулалтыг сайжруулахад чиглэсэн спортын зургаан төрлөөр зохион байгууллаа. Тэмцээнд оролцсон хүүхдүүд хариу үйлдлийн хурд, анхаарал төвлөрөлт, тэсвэр хатуужлаа сорин өрсөлдөж, авьяас чадвараа нээн харуулсан юм.

Мөн тэмцээний үеэр хүүхдүүд үе тэнгийнхэнтэйгээ багаар хамтран ажиллаж, харилцаа холбоогоо хөгжүүлэхийн зэрэгцээ өөртөө итгэх итгэлээ нэмэгдүүлж, нийгэмших бодит боломжийг бүрдүүлэв.

Эх сурвалж: Хүүхэд гэр бүл хөгжил хамгааллын ерөнхий газар