Гуравдугаар улирлын зураг авалт Есдүгээр сарын 30-нд дууссан бөгөөд энэ өдөр нь мөн лхагва гараг байсан нь цувралын онцлогтой давхацсан байна. “Netflix” зураг авалт дууссаныг зарлахдаа Уэнсдэй Аддамс бичгийн машины ард сууж буй зургийг нийтэлжээ.

“Wednesday” цуврал 2022 онд нээлтээ хийснээсээ хойш “Netflix”-ийн хамгийн амжилттай бүтээлүүдийн нэг болсон. Тус цувралын эхний улирал одоогоор платформын хамгийн олон үзэлттэй англи хэл дээрх цуврал хэвээр байгаа бөгөөд эхний 91 хоногт 252.1 сая үзэлт бүртгэгдсэн байна. Харин хоёрдугаар улирал мөн платформын бүх цаг үеийн хамгийн их үзэлттэй бүтээлүүдийн жагсаалтад багтжээ.

Гуравдугаар улиралд Уэнсдэйн гэр бүлийн түүх илүү өргөжих бөгөөд “Офелия” хэмээх шинэ дүр чухал байр суурь эзлэхээр байна. Францын жүжигчин Ева Грин Мортишия Аддамсын эгч, Уэнсдэйн нагац эгч Офелия Фрампын дүрд тоглоно. Офелия нь хоёрдугаар улирлын төгсгөлд анх гарч, Уэнсдэйн дараагийн адал явдалтай холбоотой шинэ нууцыг бий болгосон дүр юм.

Мөн гуравдугаар улиралд Уинона Райдер, Крис Сарандон, Ноа Тэйлор, Оскар Морган, Кеннеди Мойер, Лена Хиди, Эндрю МакКарти, Жеймс Лэнс зэрэг жүжигчид шинээр нэгдэж байна. Харин Женна Ортега Уэнсдэйн дүрдээ, Кэтрин Зета-Жонс Мортишия, Луис Гузман Гомез, Айзек Ордонез Пагслигийн дүрд тус тус эргэн тоглоно.

Шинэ улирлын зураг авалтыг голчлон Ирландын Дублин хотын орчимд хийсэн бөгөөд Парис хотод мөн зураг авалт хийжээ. Энэ нь Уэнсдэйн үйл явдал өмнөх улирлуудаас илүү өргөн хүрээнд өрнөхийг харуулж байна. Цувралыг бүтээгчид гуравдугаар улиралд Аддамсын гэр бүлийн талаар илүү олон нууц дэлгэж, Nevermore академийн ертөнцийг цааш өргөжүүлэхээ мэдээлсэн байна.

Одоогоор “Wednesday” цувралын гуравдугаар улирлын нээлтийн товыг “Netflix” албан ёсоор зарлаагүй байна. Харин зураг авалт бүрэн дууссан тул дараагийн шатны үйлдвэрлэлийн ажил үргэлжилж байгаа юм.

 

Эх сурвалж: Netflix