Тэрбээр сүүлийн өдрүүдэд өрнөж буй улс төрийн маргаан нэг хүний асуудал руу хэт төвлөрч байгааг шүүмжлээд, УИХ эдийн засаг, төсөв болон иргэдийн амьжиргаанд шууд хамаарах асуудлуудад анхаарлаа хандуулах ёстой гэж үзэж байгаагаа илэрхийлэв.

Б.Энхбаяр “Намайг чөлөөлөөд Монгол Улс амар сайхандаа жаргах юм бол би сайдын ажлаа өгөхөд бэлэн” гэсэн байр суурийг илэрхийллээ. Түүнчлэн өөрийг нь огцруулах эсэх нь түүний хувийн асуудлаас илүүтэйгээр төрийн бодлого, улс орны өмнө тулгамдсан асуудлыг шийдвэрлэх үйл явцаас анхаарал сарниулах ёсгүй гэдгийг онцоллоо.

Мөн нэг хүнийг буруутгаж, албан тушаалаас нь чөлөөлснөөр эдийн засгийн хүндрэл, төсвийн алдагдал, иргэдийн амьжиргаатай холбоотой асуудал автоматаар шийдэгдэхгүй гэдгийг тэрбээр хэлэв.

Тиймээс УИХ улс төрийн маргаанаас илүүтэйгээр 2026 оны төсвийн тодотгол, төрийн санхүүгийн сахилга бат, төсвийн зарцуулалт болон иргэдийн амьжиргаанд нөлөөлөх шийдвэрүүдэд төвлөрөх шаардлагатай гэж Б.Энхбаяр үзэж буй аж.

Тэрбээр мөн өөрийгөө улс төрийн дарамт, албан тушаалын төлөөх тэмцлээс айж, ухарч суух хүн биш гэдгээ илэрхийлж, “Би нээх айж хургаад байдаг ч хүн биш” хэмээн байр сууриа илэрхийлэв.