УИХ-ын намрын ээлжит чуулган нээлтээ хийж байна. Чуулганы нээлтийн ажиллагаанд 65 гишүүн оролцов. Нээлтэд Ерөнхийлөгч У.Хүрэлсүх, Ерөнхий сайд Л.Оюун-Эрдэнэ нар оролцож байна.
Чуулганы нээлтийг хийж УИХ-ын дарга Г.Занданшатар “Эдийн засгийн өсөлт 2022 оны эхний хагас жилд 1.9 хувь болсон нь цар тахлын өмнөх жилтэй харьцуулахад сул байна. Бизнесийн орлого, иргэдийн цалин буурч байна. Энэ нөхцөл байдал цааш үргэлжилбэл иргэдийн амьжиргаа улам бүр доройтож, үнийн өсөлтийг гааруулах бодит эрсдэл үүсэж байгаа. Ирэх онд манай улс 5.7 тэрбум ам.долларын өр төлөх үүрэгтэй нь бас нэг эрсдэл учруулж байна.
Бизнес эрхэлье гэвч барьцаа хөрөнгөгүйн улмаас зээл авах боломжгүй иргэд олон байна. Ийм иргэдэд зориулсан “Итгэлийн зээл” хөтөлбөрийг хэрэгжүүлье” гэсэн юм. Импортоос-Экспорт руу, Халамжаас-Хөдөлмөрт зэрэг 5 бодлогыг хэрэгжүүлж ажилламаар байна. Түүнчлэн нам улс төрийн талцахыг хойш тавьж төрийн ажлыг эрхэмлэн дээдэлж, сэтгэл зүтгэл гарган ажилламаар байна. Бидэнд өнгөрсөн хугацаанд хийж бүтээсэн олон сайхан ажил бий. Бид хоноцын сэтгэлээр “ЭХ ОРОН, АРД ИРГЭДДЭЭ” хандаж болохгүй ээ гэлээ.
